У мінулую суботу ў сядзібе Партыі БНФ рэдакцыя Радыё "Свабода" прэзентавала сваю кнігу “Плошча, 19.03 - 25.03.2006” з серыі “Бібліятэка Свабоды. XXI стагоддзе”. У ёй змешчаны рэпартажы, інтэрв’ю, апытанні, званкі слухачоў, якія гучалі ў эфіры Радыё "Свабода" і друкаваліся на сайце svaboda.org у дні і ночы існавання намётавага лагеру на “так званай Кастрычніцкай” плошчы, пасля абвяшчэння абсурдных вынікаў прэзідэнцкіх “так званых выбараў”.

Ёсць у гэтай кнізе інтэрв’ю з людзьмі з Мядзельшчыны. Карэспандэнт Радыё "Свабода" Міхал Стэльмак запісаў інтэрв’ю з сябрамі партыі АГП Андрэем Абалевічам і Андрэем Якушонкам, а таксама з сябрам Партыі БНФ Зміцерам Вінаградавым. Узгадваецца, што Андрэй Абалевіч на трэці дзень пасля “так званых выбараў” быў арыштаваны на 7 сутак на падыходзе да “так званай Кастрычніцкай” плошчы. Прысудзілі Андрэю нецэнзурную лаянку ў грамадскім месце. Дарэчы, беларускія праваахоўчыя органы апошнім часам зацыкліліся на гэтай фармуліроўцы. Яе “шыюць” практычна ўсім апазыцыянерам.
Падчас разгону намётавага лагеру быў арыштаваны яшчэ адзін хлопец з Мядзела – Уладзіслаў Калінін. Ён адбываў свой прысуд у Жодзінскім СІЗА.