Нарэшце! Нарэшце ў Мядзел прабіўся пакуль яшчэ вельмі кволенькі праменьчык святла. Бо 4 траўня адчынілася крама “Кнігі” ад мінскага прадпрыемства ПУП “Каапкнігагандаль”. Месціцца яна ў старэнькім драўляным будыначку былой крамы “Падтрымка сядзібных гаспадарак”, што па завулку Савецкім, дом 2. Гэта паміж хлебным магазінам і універмагам.

Выбар друкаванай прадукцыі пакуль што не вельмі. Асабліва аказаліся пакрыўджанымі беларускамоўныя дзеткі. Для іх зусім нічога няма. Усе кнігі, буклеты, мапы, паштоўкі толькі для носьбітаў мовы суседняй краіны. Хіба што, беларусы могуць задаволіцца некалькімі кніжкамі серыі “Беларуская проза XX стагоддзя”, дэтэктывам “Карона Вітаўта Вялікага” і слоўнікамі.
Будзем спадзявацца, што мінскія гандляры ўсё ж такі паклапоцяцца пра патрэбы людцаў карэннага этнасу Мядзельшчыны, і асабліва дзетак.
Адкрыцце падобнай кнігарні - гэта напэўна ўсё ж такі свята душы для жыхароў нашага раёна. Бо ад пачатку кіравання “адзінага і незамянімага”, у Нарачанскім краі пазачыняліся ўсе нармальныя кніжныя крамы. І людзі спаўна адчулі сапраўдны кніжны голад. Дасць Бог, можа быць гэты праменьчык святла ўсё ж такі не згубіцца, не згіне ў цемры валадарства распусты, п’янства і бездухоўнасці.