Урачыстасці з нагоды свята Перамогі ў нашым раёне распачаліся за некалькі дзён з традыцыйнай сустрэчы пакаленняў на комплексе “Партызанскія базы”, што ў Чарэмшыцкім лесе. Там жа дзеці далі ўрачыстае абяцанне, а ветэраны павязалі ім піянерскія гальштукі. А старшыні абласной і раённай ветэранскіх арганізацый Аляксандр Слабада і Міхаіл Гардон уручылі юнакам і дзяўчатам членскія білеты БРСМ.

9 мая а 11 гадзіне ў райцэнтры распачаліся святочныя мерапрыемствы. Спачатку адбылося ўрачыстае шэсце прадстаўнікоў арганізацый і прадпрыемстваў раёна з плошчы Шаранговіча да брацкай магілы што па вуліцы Юбілейнай (на выездзе з Мядзела на Менск), дзе ўсклалі кветкі і вянкі. Там жа з кароценькай прамовай выступіў ваенны камісар раёна падпалкоўнік Радкевіч. Па шляху святочнай калоны па абодва бакі вуліцы выставілі дзетак з балёнікамі і маленькімі лукашэнкаўскімі сцяжкамі. Потым ў амфітэатры ля возера Мястра адбылося тэатралізаванае прадстаўленне і святочны канцэрт.Канешне ж працаваў і выяздны гандаль.
Бясспрэчна, Дзень Перамогі – гэта сапраўды народнае свята. Але адзначаецца яно неяк па-савецку, занадта па-казённаму. Напэўна не хапае нейкай душэўнасці ў гэтых мерапрыемствах. Людзей прымушаюць адбываць павіннасць - несці тыя ж вянкі і г.д. А многія ж спяшаюцца дадому, бо на агародах час пасадкі бульбы.
Неяк міжволі ўзгадваецца штогадовы Будслаўскі каталіцкі фэст у ліпені. Вось там сапраўды свята ад душы. Ніхто нікога не прымушае, а людцы едуць і ідуць з усіх бакоў да Маці Божай. Так што, ёсць над чым прызадумацца нашым уладам.