Як бы не хваліліся нашыя “дзяржаўныя мужы”, што ў нашай “сильной и процветающей» Беларусі справы лепш за ўсе краіны свету, тым не менш жыццё канстатуе іншы бок. Крычаць з усіх трыбунаў, што ўтаймавалі злачыннасць, а тым часам што ў адным асобна ўзятым раёне - Мядзельшчыне?
Толькі нядаўна ўсе былі шакаваныя рабаўніцтвам касцёла ў вёсцы Канстанцінава і вось новы факт.

13 траўня каля 19 гадзін двое невядомых мужчын зрабілі напад на дзяржаўную краму “Верас” у г.Мядзеле, што насупраць раённай бальніцы. Яны пад пагрозай прадмета падобнага на аўтамат забралі выручку ў суме 2616110 рублёў і асабісты мабільны тэлефон прадаўца. Злачынцы знаходзяцца ў вышуку.
Кепскія справы і на дарогах Мядзельшчыны. Новы адміністрацыйны Кодэкс не палепшыў сітуацыю. Мяркуйце самі: за чатыры месяцы бягучага года зарэгістравана 8 ДТЗ, у якіх 2 чалавекі загінулі і 10 атрымалі пашкоджанні рознай ступені цяжкасці; затрымана 88 вадзіцеляў за кіраванне транспартам ў стане алкагольнага ап’янення. І таму ў мэтах прыняцця мер грамадскага ўздзеяння, па просьбе мясцовай дзяржаўтаінспекцыі на старонках газеты “Нарачанская зара” пачалі змяшчаць спіс грамадзян, якія затрыманы за рулём п’янымі. Першы спіс за 16 мая складаецца з 48 прозвішчаў. І такія звесткі будуць друкавацца штомесячна.
Іншыя ж здарэнні, якіх безліч, ужо і не ўражваюць. Бо гэта крадзяжы сотавікаў, веласіпедаў, нейкай сумы грошай, сала, каўбас і г.д.; гэта мардабоі, махлярствы, ухіленні ад аліментаў і адбыцця папраўчых работ і іншае.