З Акадэміі кіраваньня адлічаны студэнт‑выдатнік Юрась Алейнік. Сярод іншага, ён зьяўляецца актывістам незалежнай ініцыятывы "За Маладэчна!", значнай асобай дэмакратычнага руху ўсяго Віленскага краю. Нягледзячы на тое, што сярэдні бал за 4 курсы вучобы ў яго складае 8,4, а апошнюю сэсію ён здаў на «дзявяткі», дэкан факультэту Ўладзімер Язэпчык заявіў, што такі чалавек не можа вучыцца ў Акадэміі.

Прычыны: афіцыйныя і неафіцыйныя

Юрась навучаўся на факультэце дзяржаўнага кіраваньня эканомікай. 16 траўня хлопца проста з распранальні пасьля валейбольнага матчу выклікалі ў дэканат, каб паведаміць, што 15 траўня яго адлічылі з Акадэміі. Афіцыйная прычына — «сыстэматычныя парушэньні вучэбнай дысцыпліны і правілаў унутранага распарадку». Выдатніка адлічылі за 22 гадзіны пропускаў у красавіку ды ігнараваньне палітычнага жыцьця ВНУ — прарэктар па выхаваўчай працы Тацяна Печанёва ўзгадала што Юрась не галасаваў на апошніх выбарах у мясцовыя саветы. Яна не прыняла да ўвагі той факт, што Ю. Алейнік быў назіральнікам на выбарах. Азнаёміўшы студэнта з загадам на адлічэньне, яму не прапанавалі расьпісацца ў ім, а параілі падумаць. Ягоны подпіс пад загадам, які б сьведчыў, што ён зь ім азнаёмлены, не стаіць дагэтуль. Хлопец меў адзіную вымову — за прагулы заняткаў. Пры гэтым запіс у юрыдычным аддзеле акадэміі сьведчыць, што прагулы адбываліся на працягу навучальнага 2006‑07 году, а ў асабістай справе — толькі ў лістападзе 2006 г.
Сапраўднымі прычынамі адлічэньня Юрась лічыць сваё старшынёўства ў абласной арганізацыі ТБМ, сяброўства ў БАЖ. Акрамя таго, ён арганізаваў збор каля паўтысячы подпісаў супраць адмены ільготаў. Досыць красамоўна гэта пацьвярджаюць такія красамоўныя факты. Рэктар Акадэміі Станіслаў Князеў праз свайго намесьніка Сяргея Сабалеўскага перадаў, што ня бачыць сэнсу для гутарак зь Юрасём і яго бацькамі. Калі маці хлопца зьвярнулася да дэкана У.Язэпчыка з пытаньнем, ці ўсе так добра вучацца ў акадэміі, што вось так проста можна адлічыць пасьпяховага студэнта, пачула наступнае: «Ваш сын ня можа тут вучыцца, больш ад мяне нічога не пачуеце». Адна выкладчыца так і параіла: адмоўся ад сваёй ідэалёгіі і застанешся вучыцца.
Тым часам, у акадэміі не існуе нарматыўнай базы, якая б сьведчыла, за якую колькасьць прапушчаных гадзінаў можна адлічыць студэнта. У групе Юрася каля траціны студэнтаў за сэмэстар маюць па 22‑30 гадзінаў пропускаў. Разам зь ім адлічылі студэнта, што меў запазычанасьці па ўсіх экзамэцыйных прадмэтах і шматлікія пропускі заняткаў.

Падтрымка

Ужо ў чацьвер 17 траўня у падтрымку Юрася было сабрана каля 250 подпісаў студэнтаў вочнага аддзяленьня. Частка падпісантаў пад ціскам адмовілася ад сваіх подпісаў. У выніку ў рэктарат патрапіла 228 копіяў подпісаў.
Цяпер адлічанага студэнта не пускаюць у акадэмію: ахова мае адпаведны загад. Апошні раз яго ўратавала журналісцкае пасьведчаньне. Дзеля перасоўваньня па корпусе да хлопца прыставілі канвой.
Праз колькі дзён пасьля адлічэньня быў праведзены адмыловы старастат, на якім спн. Печанёва параўнала Юрася з Казуліным.

«Я даў ім шанец усё выправіць»

Юрась Алейнік будзе судзіцца. «Цэлы тыдзень я чакаў, думаў, што сытуацыя выправіцца, бо занадта шмат у гэтай справе хібаў. Але, відно, давядзецца судзіцца» — кажа ён. Бараніць інтарэсы хлопца ў судзе будзе Алег Гулак. У панядзелак 28 траўня ў суд будзе накіраваная скарга. Юрась разглядае ад’езд за мяжу, як найбольш скрайнюю меру. Кажа, што прыкладзе ўсе намаганьні, каб давучыцца тут, альбо завочна за мяжой. Пад пагрозай апынулася і другая вышэйшая адукацыя, якую ён атрымоўвае ў БДУ. Ужо гэтым летам яго могуць забраць у войска. Хлопец ня супраць, але спачатку хоча атрымаць адукацыю.

Выдатнік, спартовец, толькі не камсамолец

Скончыў школу з залатым мэдалём. Навучаўся ў музычнай школе. Зьяўляецца стваральнікам і першым віцэ‑прэзыдэнтам клюбу замежных моваў Акадэміі SCOEFL. Удзельнік і прызёр інтэлектуальных гульняў. Захапляецца спортам: на працягу ўсёй вучобы прымаў удзел у спартыўных спаборніцтвах па валейболе (член зборнай Акадэміі апошнія два гады), футболе, баскетболе, боўлінгу. Мае 21 год. Вырас у Маладэчне ў шматдзетнай сям’і. Пазаштатны карэспандэнт НН.