Нарэшце Мядзельскі раённы аддзел унутраных спраў узначаліў “тутэйшы” хлопец. Загадам міністра, начальнікам мядзельскай міліцыі прызначаны маёр Аляксей Балюк, які да гэтага быў першым намеснікам у Васіля Малікава. Два тэрміны РАУС узначальвалі "прышэльцы": то з Жодзіна, то са Стаўбцоў. Сваім не давяралі.

Дарэчы, былы начальнік Васіль Малікаў, зараз кіруе міліцыяй у Вілейцы. Які сэнс было цягнуць у Мядзела на пасаду начальніка міліцыі “чужынцаў”? Гэтыя прызначэнні былі толькі на шкоду дзяржаўнаму бюджэту. Чаму? Мяркуйце самі! Усе гэтыя прыезжыя начальнікі чамусьці пасяляліся жыць толькі ў к.п.Нарач. А гэта каля 20 км у адзін бок. Канешне ж, у гэтым разе, начальніку патрабуецца службовы аўтамабіль для таго, каб прыехаць на службу ў Мядзел, потым з’ездзіць дадому на абед і вярнуцца, а потым вечарам даехаць да хаты. Як мінімум, штодня каля 80 км пустых паездак. А хлопцам-міліцыянерам часам па тэрміновых службовых справах няма на чым выехаць.
Новаму кіраўніку РАУС, Аляксею Канстанцінавічу Балюку, хутка споўніцца 38 год. Ён нарадзіўся і вырас у Мядзеле. Бацька яго, ветэран міліцыі, служыў зампалітам у раённым аддзеле ўнутраных спраў. І пакінуў аб сабе добрую памяць.
Спадзяёмся, што Аляксей Канстанцінавіч, як сапраўдны міліцыянер і прафесіянал крымінальнага вышуку, скіруе намаганні РАУС на адданае служэнне беларускаму народу, а не чыноўнікам-вертыкальшчыкам ад улады.
Спадзяёмся, што Аляксей Канстанцінавіч не дапусціць выкарыстання сваіх падначаленых у палітычных мэтах, і асабліва для пераследу іншадумцаў.