Песні на вершы Я.Купалы і Я.Коласа прагучаць у выканнані зводнага хора (амаль 600 галасоў) Мінскай вобласці на абласным фестывалі "Пеўчае поле". Яркі форум харавога мастацтва збяре сёння ў Мядзеле 14 лепшых аматарскіх харавых калектываў сталічнага рэгіёна. На працягу двух дзён яны стануць удзельнікамі конкурснай праграмы і святочнага гала-канцэрта.

Фестываль "Пеўчае поле" ладзіцца на Міншчыне пачынаючы з 1952 года і за гэты час ператварыўся ў адзін з найбольш значных музычных фэстаў. Па традыцыі самадзейныя хоры з розных куткоў вобласці прэзентуюць на фестывале свае новыя праграмы. У гэтым годзе яны будуць прысвечаны 125 гадоваму юбілею песняроў беларускага народа. А падчас заключнага гала-канцэрта зводны хор пад кіраўніцтвам народнага артыста Беларусі Міхаіла Дрынеўскага выканае песні "Мой родны кут" на вершы Я.Коласа і "За свабоду сваю" на вершы Я.Купалы.
Па словах Наталлі Даўнаровіч, ганаровымі гасцямі "Пеўчага поля-2007" будуць Нацыянальны акадэмічны народны хор Рэспублікі Беларусь імя Г.Цітовіча, заслужаны аматарскі калектыў Рэспублікі Беларусь ансамбль песні і танца "Спадчына" Палаца культуры г.Маладзечна, народная харавая капэла Гомельскага абласнога Дома тэхнічнай і мастацкай творачасці. На галоўнай сцэнічнай пляцоўцы фестываля - адкрытым амфітэатры на беразе возера Мястра ў цэнтры Мядзела - яны выступяць з канцэртамі.
У рамках фестываля ў райцэнтры будуць арганізаваны выстаўкі-продажы вырабаў народных майстроў Міншчыны. Завершыцца свята харавога мастацтва сталічнага рэгіёна ўзнагароджаннем калектываў-пераможцаў. У якасці галоўнага прыза лепшы хор вобласці атрымае тэлевізар, рэзюміравала Наталля Даўнаровіч.