Лета закончыцца заўтра. У пятніцу яшчэ +30. Але ў суботу ўдзень будзе +16 і пойдуць дажджы.

Незвычайна цёплаю была вясна. Сапраўдная гарачыня стала ўжо ў траўні. А сапраўднае пекла пачалося ў ліпені, калі сіноптыкі паўжартам называлі называлі самым халодным Віцебск, дзе ртутны слупок сягаў +32 градусаў. Месцамі гарачыня ўздымалася да 40 градусаў. Былі пабітыя рэкорды веснавыя, пасля ліпеньскія, цяпер — жнівеньскія.
14 жніўня ў самым паўночным абласным цэнтры Беларусі — Віцебску слупок тэрмометра падняўся да адзнакі +30,1 градуса. Ранейшы рэкорд, зафіксаваны ў 1939 годзе, складаў 29,5 градуса.
У Мінску быў паўтораны рэкорд, зарэгістраваны ў 1939 годзе, — 29,6 градуса цяпла.
Небяспечна стала ўжываць грыбы, нават улюбёныя лісічкі — у іх ад спёкі ўтвараецца шмат таксынаў. Няможна купацца ў шмат якіх вадаёмах, ды есці азёрную рыбу. Рыбы пакутуюць да паразітаў і браку кіслароду. Цяжка і жабам.
Пацяпленне заўважна шкодзіць хваёвым, гарадзкія дрэвы жоўкнуць без пары, лістота на іх радуе нас добра калі да сярэдзіны лета.
Спякота не дала гэтым годам паласавацца вішнямі ды слівамі. У той жа час сялянаў цешыць урадлівасцю кукуруза, а таксама проса. Навукоўцы бачаць перспектывы вырошчвання ў Беларусі сорга. Гарачыня робіцца нормай: 7 з апошніх дзесяці летаў былі спякотнымі.
Цяжка даецца пацяпленне клімату людзям з падвышаным ціскам ды хворым сэрцам. Ім прыходзіцца абмяжоўваць актыўнасць, менш рухацца.
Беларусь не адзіная краіна, што сёлета цярпела ад апалаў. У Венгрыі загінула паўтысячы чалавек. Малдова просіць дапамогі праз вялізныя страты ўраджаю.
Не варта, аднак, паддавацца апакаліптычным настроям. Такія незвычайна гарачыя сезоны ўжо фіксаваліся ў нашай гісторыі.