Даволі звыклае для сучаснай Беларусі завяршэнне атрымаў выпадак з затрыманнем 6 кастрычніка ўначы ў Мядзелі актывіста Руху "За Свабоду" Зміцера Падрэза. У аўторак 16 кастрычніка сакратарка дэканата ТТЛП (Тэхналогія і тэхніка лясной прамысловасці), студэнтам 3-га курса якога з'яўляецца Зміцер, выклікала на размову да дэкана Вырко Мікалая Паўлавіча. Той паказаў ліст з мядзельскай міліцыі пра затрыманне 6 кастрычніка і паведаміў, што тое затрыманне з'яўляецца "парушэннем унутранага распарадку навучальнай установы з боку студэнта". Таму кіраўніцтвам факультэта было прынятае рашэнне пра выключэнне Зміцера Падрэза. Гэта значыць, фактычна прычынай магчымага выключэнне стаў "сігнал" ва універсітэт з боку мядзельскай міліцыі.

Нагадаем, падчас затрымання на Зміцера Падрэза быў складзены пратакол аб адміністрацыйным правапарушэнні. Пазней раённая міліцыя адмовілася весці справу далей. Справа была прыпынена, да суда не дайшла. Незаконна канфіскаваны ў Зміцера тэлефон КДБ вярнула толькі праз 10 дзён. Зрэшты, на думку прадстаўнікоў КДБ, зусім незразумела, навошта міліцыя забрала тэлефон падчас допыту.
Канчатковае рашэнне наконт Зміцера Падрэза прымаў сам рэктар БДТУ Жарскі Іван Міхайлавіч: ён не пагадзіўся з меркаваннем кіраўніцтва факультэта наконт выключэння юнака з універсітэта.
Зрэшты, наперадзе сесія.