Прыход новага старшыні райвыканкама Аляксандра Даніленкі адразу ж адчулі прадпрымальнікі Мядзельшчыны. На адным з паседжанняў было “рэкамендавана” мінскія альбо іншыя (вытворчасці не свайго раёна) хлебабулачныя вырабы прадаваць толькі ў выходныя дні. А вось па буднях прадаваць лепш за ўсё толькі мядзельскі хлеб і асабліва прадпрыемства “Хлебапёк”. Ну, а калі не паслухаешся раённых уладаў, то напэўна праз нейкі час крышачку і пашкадуеш.

Але як не стараюцца спецыялісты “Хлебапёка”, людзі нашыя чамусьці ўсё ж аддаюць перавагу прывазному хлебу – вілейскаму, мінскаму альбо пастаўскаму. І як тыя, не нашыя, хлебныя майстры ўмеюць так працаваць, што здольныя дагадзіць густу мядзельчан?
А нашыя раённыя ўлады па-ранейшаму не пераймаюць добры досвед у суседзяў і проста ўпарта не хочуць кардынальна змяніць сітуацыю на прадпрыемстве “Хлебапёк”. А адміністрацыйныя метады кіравання ў такой справе напэўна толькі зашкодзяць. Людзі Мядзельшчыны жадаюць бачыць на сваіх сталах духмяны бохан якаснага і адносна недарагога хлеба мясцовай вытворчасці. Цікава, а які ж хлеб набываюць кіраўнікі Мядзельскага райвыканкама?