Нядаўна Міністэрства замежных спраў Чэшскай Рэспублікі за паглыбленне чэшска-беларускіх дачыненняў у галіне культуры, ўзнагародзіла бронзавымі медалямі імя Яна Масарыка і ганаровымі дыпломамі семярых беларусаў з ліку дэмакратычнай інтэлігенцыі. А сярод іх прадстаўнік Мядзельшчыны, вядомы мастак Алесь Цыркуноў. Хаця ён і мянчук, але большую палову года жыве на сваім лецішчы ў вёсцы Чэхі, апошнім населеным пункце на мяжы з Пастаўскім раёнам па трасе Вільня–Полацк. У кожную нядзелю і ў сапраўднае нацыянальнае свята (не аўтарства ППРБ) вывешвае на фасадзе сваёй хаты бел-чырвона–белы сцяг. Значная частка твораў мастака прысвечана Нарачанскаму краю.

Як кажа Алесь Цыркуноў, у 2005 годзе ў Беларусі адзначаліся 155-я ўгодкі нараджэння першага прэзідэнта Чэхіі Томаша Масарыка. Ян Масарык – гэта міністр замежных спраў пасляваеннай Чэхаславаччыны, сын першага прэзыдэнта. І вось тады сябры грамадска-гістрычнага клубу “Спадчына” зладзілі ў сталічным Доме літаратара вечарыну, прысвечаную Масарыку. Пасля таго яны вывучалі гісторыю чэшска-беларускіх культурных стасункаў і адлюстроўвалі яе ў сваіх творах: даследавалі архіўныя матэрыялы, пісалі артыкулы, малявалі. Сам Алесь Цыркуноў напісаў карціну “Святазарны мур”, прысвечаную беларускім студэнтам, якія на запрашэнне Томаша Масарыка вучыліся ў Карлавым універсітэце (гэта хваля часу Забэйды-Суміцкага, Ларысы Геніюш ды іншых, там было з паўтысячы чалавек). У творы адлюстраваныя найбольш выбітныя людзі.
Віншуем Алеся Цыркунова з высокай ўзнагародай і зычым творчых поспехаў!