“Летам мы не можам нічога будаваць, бо займаемся турыстамі. Цяпер жа самы час, тым больш, што і надвор’е дазваляе”, – кажа загадчык аддзела турызму парка Аляксей Шапецька.

Па яго словах, да канца снежня, завершыцца будаўніцтва музея прыроды ў дэндралагічным садзе вёскі Нікольцы, што на беразе Нарачы. На экалагічнай сцежцы “Блакітныя азёры” цяпер устанаўліваюць альтанкі з цыліндраваных бярвёнаў. На пляжах выкладваюць дарожкі, будуюць душавыя кабінкі і кабінкі для пераапранання, пітныя фантанчыкі, спартыўныя і дзіцячыя пляцоўкі.
У Купе да 20-х чыслаў, як кажа Аляксей Шапецька, будзе падрыхтаваная экспазіцыя для новага эколага-асветніцкага цэнтра. З яе наведвальнікі змогуць атрымаць інфармацыю пра нацыянальны парк. У цэнтры будзе таксама канферэнц-зала на 80 месцаў, у якой, па словах загадчыка аддзела турызму, будуць праходзіць канферэнцыі, сімпозіумы не толькі рэспубліканскага, але і еўрапейскага значэння.