Напярэдадні новага 2008 года пробашч Мядзельскай парафіі Маці Божай Шкаплернай айцец Раман Новак раптоўна развітаўся з вернікамі і выехаў у Польшчу.

Святару не выдалі дазвол на далейшую працу ў Беларусі. Афіцыйная прычына гэтага невядомая. Ніхто не мае смеласці патлумачыць, што насамрэч здарылася. Таму, на жаль, гэта сітуацыя параджае розныя плёткі. Відаць, камусьці гэта вельмі і вельмі выгадна. Мядзел, і не толькі, “гудзіць” як той вулей. Распачалася жорсткая барацьба за змену складу касцельнага камітэта. Але гэтая, так бы мовіць, “вайна групіровак”, ў Мядзельскім касцёле ідзе ад пачатку аднаўлення парафіі ў 1989 годзе.
Падчас развітання ў касцёле 30 снежня, айцец Раман папрасіў прабачэння за тое, што так і не вывучыў беларускую мову (але добра валодае расейскай). Тым не менш пробашч заклікаў вернікаў любіць сваю Бацькаўшчыну і вучыць беларускай мове моладзь.
У нядзелю, 6 студзеня, чакаўся прыезд новага ксяндза з Польшчы. А пакуль парафіяй кіруе айцец Бярнард Радзік з Кабыльніка.