У лістападзе гэтага году ў мінскай Архікатэдры адбылося ўрачыстае заканчэнне конкурсу ведаў пра жыццё, дзейнасць і творчасць Яна Паўла II.

13-ці гадовыя мядзельчане браты-блізняты Крывенькія Вадзім і Дзіма аказаліся ў ліку лепшых канкурсантаў. Яны атрымалі дыпломы і невялікія сувеніры. А зімой, падчас школьных канікулаў, хлопцы ў ліку 16 пераможцаў, адправяцца ў пілігрымку па слядах Яна Паўла II у Польшчу. Вадзім і Дзіма Крывенькія вельмі ўсцешаныя асабістай перамогай. адзначылі, што “дзякуючы Марыі, дасягаюцца вяршыні п’едэсталу”.
Дарэчы гэтыя хлапчукі-блізняты вельмі актыўныя па жыцці, ну проста гарэзлівыя непаседы. А да Касцёла ў іх асаблівае стаўленне. У Мядзельскім Касцёле Маці Божай Шкаплернай Вадзім і Дзіма служаць міністрантамі, а ў дзіцячым Лёгіёне Марыі “Слугі Сэрца Марыі” яны сапраўдныя лідэры. Спрабуюць хлопцы ўслаўляць Касцёл і ў вершах:

А цяпер пра легіён Вам
Мы раскажам пару сказаў.
Гэта самы лепшы спосаб
Навярнуць людзей да Бога.
У Легіёне ўсе мы можам
Заахвоціць народ Божы.
Каб любіў мацней ён Бога
І служыў яму прыгожа.

Дзякуй Богу, што на Мядзельшчыне такая цудоўная моладзь! І ці варта казаць, што моладзь сёння не такая як раней ( у сэнсе горшая)?