У суботу 13 студзеня каля 10 гадзін раніцы, лідэр беларускіх Дэмакратычных Сілаў Аляксандр Мілінкевіч, як давераная асоба кандыдата ў мясцовыя Саветы Дзмітрыя Вінаградава, наведаў Мядзел. Мэта візіту - сустрэчы, гутаркі з людзьмі, прадпрымальнікамі мястэчка.

У Мядзелі Аляксандр Мілінкевіч правёў блізу 3 гадзін. За гэты час ён паспеў наведаць разам з Дзмітрыем Вінаградавым мясцовы кірмаш, крамы, выбарчыя ўчасткі, зайшлі нават у райаддзел міліцыі, касцёл.Дарэчы, на выбарчых участках у гімназіі №1, сярэдняй школе №1 і №2, як адзначылі сябры камісій датэрмінова прагаласавалі каля 20% выбаршчыкаў. Падчас сустрэчаў распаўсюджваліся друкаваныя агітацыйныя матэрыялы Дзмітрыя Вінаградава. Як адзначыў Аляксандр Мілінкевіч, "... зусім яшчэ нядаўна за мяне агітавалі як кандыдата ў Прэзідэнты Беларусі, а зараз я дапамагаю сваім людзям, вяду агітацыю за іх - і так мусіць быць...".Варта адзначыць, што сустрэчы адбыліся без ніякіх непрыемных інцыдэнтаў (затрыманняў міліцыяй для праверкі дакументаў ці штось іншае, увогуле як гэта было ў іншых гарадах) - Мядзельшчына ў гэтым плане прыемна ўражвае.
Адзінае, неўзабаве пасля таго, як Аляксандр Мілінкевіч пачаў размовы на мясцовым кірмашы, сябрамі каманды была заўважана сачэнне з боку маладога чалавека, спартыўнага целаскладу. Як высветлілася пазней, то быў Дзмітрый Ш. - супрацоўнік мясцовага аддзялення КДБ.На машыне, разам з іншым супрацоўнікам, яны пастаянна былі на хвасце гасцей з Мінску. Пасля, калі Аляксандар Мілінкевіч паехаў у Мінск, мядзельскія кэдэбэшнікі працягвалі сачыць за аўтамабілем Дзмітрыя Вінаградава. Але той вырашыў дзейнічаць "па-сяброўску": спыніўся, падыйшоў і павітаўся з імі, паразмаўляў, раздаў агітацыйныя матэрыялы пра сябе. Усё скончылася добра - "праца" ў іх такая, у кэдэбэшнікаў, сачыць, трымаць сітуацыю пад кантролем. Нават калі і сэнсу ў гэтым няма. Але тут толькі адно пытанне паўстае, чаму беларусы мусяць выдаткоўваць свае грошы на ўтрыманне арміі такіх "агентаў"? Можа ім, як той, казаў ісці грошы па-мужчынску зарабляць? Гэта твар існуючай улады ў Беларусі.