Мядзельскія вернікі каталіцкага веравызнання ўважліва прачытаўшы суботні нумар (ад 6 студзеня 2007 года) раённай газеты “Нарачанская зара”, асабліва каталіцкі каляндар на новы год, прыйшлі ў нядзелю, 7 студзеня, у касцёл са свечкамі. Многія хацелі купіць свечкі ў касцёле і пасвенціць як грамнічныя. Іншыя вернікі і пробашч касцёла не маглі ўцяміць, што адбываецца з людзьмі. Што за жарты навагоднія! Сёння ж святкуецца Хрост Пана! Свенціцца толькі вада!

Дык гэта ж аказваецца “Нарачанка” падклала свінню вернікам! Рэдакцыя газеты так і напісала: 7 студзеня – Грамніцы(Стрэчанне Гасподняе). На самой жа справе сёлета як і кожны год гэтае свята адзначаецца толькі 2 лютага.
Але ж “Нарачанцы” гэтага падалося мала, яна і каталіцкае Купалле (Нараджэнне Яна Хрысціцеля) перанесла на 15 чэрвеня. А ўсе ж людцы адзначалі яго толькі 24 чэрвеня.
Вось і вер пасля такога беларускім дзяржаўным сродкам масавай інфармацыі. Напэўна ад БТ вучацца!