Ці ёсць Беларусь прававой дзяржавай? Ці з'яўляецца Канстытуцыя ў нашай краіне асновай законнасці? Увогуле, ці лічыць цяперашняя ўлада Канстытуцыю Законам, а не стосам паперы? Усе гэтыя пытанні хутчэй рытарычныя і, відаць, не маюць іншага адказу як "Не". А між іншым, менавіта 15 сакавіка, у 1994 годзе, была прынята першая Канстытуцыя незалежнай Беларусі. Няма таго, што было раней. А з'явілася новая Беларусь - ізгой цывілізаванага свету.

Канстытуцыя 1994 г. абвясціла Рэспубліку Беларусь унітарнай дэмакратычнай сацыяльна-прававой дзяржавай. Тэрмін «сацыяльна-прававая дзяржава» азначае, што асноўнай мэтай РБ з'яўляецца стварэнне ўмоў для свабоднага развіцця асобы, рэалізацыя яе інтарэсаў у рамках існуючых законаў. Канстытуцыя ўстанавіла новую - прэзідэнцкую форму дзяржаўнага кіравання. Пры прэзідэнцкай форме кіравання прэзідэнт з'яўляецца кіраўніком дзяржавы. Ён фарміруе вышэйшы выканаўчы орган улады - урад (Савет Міністраў) і нясе адказнасць за яго дзейнасць.
Ды вось, першы прэзідэнт спачатку мову і сімвалы адабраў у беларусаў, а потым, у 1996 годзе, і Канстытуцыю. З таго часу ў нашай краіне ёсць толькі воля ашалелага "празідзента". А Канстытуцыя - проста стос паперы, і нічога больш...
А яшчэ 15 сакавіка адзначаецца як Міжнародны дзень супраць жорсткасці паліцыі (міліцыі). Для Беларусі, з яе сілавымі структурамі, то відаць надзвычай актуальна.