Наш Мядзел такі невялічкі па колькасці жыхароў. Ну проста мястэчка!
Заезжыя люд і проста турысты бачаць прыгожыя скверы, паркі з разнастайнымі кветкавымі клумбамі. Асабліва пасля вераснёўскага экалагічнага форуму.... Але гэта толькі знешняе ўражанне. Горад спакойны і прыгожы ўдзень. А што адбываецца тут увечары? Вось якія жудасныя выпадкі здарыліся напачатку снежня.

Здарэнне першае. Барыс З., навучэнец Свірскага сельскагаспадарчага прафесійнага ліцэя, 18-цігадовы юнак, пасля дыскатэкі, у пятніцу 1-га снежня, вырашыў прагуляцца па вуліцах горада. Але “прагулка” была нядоўгая. Каля аўтастанцыі, хлопец па пешаходнаму пераходу памкнуўся на другі бок вуліцы. Менавіта тут і абарвалася жыццё юнака. Смерць наляцела ў выглядзе легкавога аўтамабіля, за рулём якога быў Ж.-малодшы з Мядзела. Людзі кажуць, што кіроўца быў нецвярозым.
Здарэнне другое. Прыйшоўшы раніцай, у суботу 2-га снежня, да мядзельскага Дому культуры, людзі заўважылі шмат крыві на сцяне і зямлі. У міліцыі кажуць, што чалавека жорстка збілі, але па горадзе ходзяць упартыя чуткі, што пры разборках выкарыстоўваўся нож, які і стаў прычынай смерці маладога хлопца.
Здарэнне трэцяе. У тую ж самую пятніцу, на гарадскім пляжы возера Мястра трое “быкоў” з “дубінамі” ў руках накінуліся на прахожага і “затаўклі” да паўсмерці. Ахвяра, няшчасны чалавек, да гэтай пары знаходзіцца ў бальніцы.
Мядзельчанам у такой сітуацыі небезпадстаўна страшна выходзіць на вуліцы свайго роднага горада ў вячэрні час. Што думае наконт гэтага мясцовая ўлада і міліцыя?